LA UNION – Addan ti nakasagana nga exit plan iti lokal a gobyerno ti syudad ti San Fernando, La Union no dumteng iti kanito a maikkat daytoy iti sidong ti enhance community quarantine (ECQ).
Iti pannakiuman ti Bombo Radyo La Union kenni City Mayor Alf Ortega, kinunana nga uray saan a nairaman iti listaan ti IATF iti probinsya ti La Union kadagiti lugar a maipasidong iti general community quarantine ket addan ti naaramid a report iti Committee on Rehabilitation and Recovery ti lokal a gobyerno ti syudad.
Sigun kenni Ortega, adalenna a naimbag iti iggemna a committee report ken kasapulan a sakbay iti April 30 a panaglippas iti ECQ ket panasengkedan ti exit plan.
Maawatan met ti alkalde a saan a mabalin a killaat nga ikkaten ti ECQ gapu ta kasapulan met a suruten ti guidlines iti IATF tapno agballigi iti laban kontra ti COVID-19 ken makabangon manen ti syudad.
