Prayoridad ita ti City Government ti Agri Self-Sufficiency tapno masulbar ti agtultuloy a problema iti syudad iti San Fernando maipanggep iti agkurkurang a suplay iti karne iti baboy ken nangangato a gagatangen iti merkado publiko.
Mainaeg iti daytoy, nagpaawag ti panagtataripnong idi kalman ni San Fernando City Mayor Dong Gualberto tapno pagsasaritaan ti nadakamat nga isyu.
Insingasing iti alkalde ti posible nga executive order tapno maipataw ti price cap wenno price ceiling iti presyo iti karne maiyannurot iti Republic Act 7581 wenno ti Price Act a no sadinno mangisayangkat pay ti public consultation ti City Government kadua dagiti nadumaduma a grupo iti consumers ken asosasyon dagiti vendors iti syudad sakbay a mangituding iti price cap.
Manamnama a maysa a public consultation ti maiganwat inton bigat no sadinno manamnama a mangipaay ti rekomendasyon ti City Price Coordinating Council kenni Mayor Dong kalpasan iti diskusyon.
Kadua ni Mayor Dong iti panagtaripnong itay bigatda City Veterinarian Dr. Flosie Decena, Provincial Veterinarian Raquel Difuntorum, ken Department of Agriculture (DA) Region 1 Operations Division Chief Dr. Annie Bares ken Chief Agriculturist – Agri Business and Marketing Assistance Division Helen Castaneda.
Adda met sadiay ni City Agriculturist Dr. Mary Jane Alcedo, City Local Economic and Business Development Officer Rizalyn Medrano, Meat Dealers Association President Melinda Adriano, ken City Market representative Lorena Peridas.
Immunan a nadakamat ni City Veterinarian Dra. Flosie Decena ken Meat Vendors Association President Melinda Adriano iti pannakiuman iti Bombo Radyo a gapu iti panagkurang iti suplay iti baboy ken panagangkat da iti ruar iti probinsiya ti makaigapu ti nangato a presyo iti karne iti baboy ditoy syudad.
Self sufficiency met ti makitkita a solusyon iti alkalde ita a parikut agsipudta awan iti pangalaan iti suplay ditoy syudad.
Iti agdama, ti presyo iti karne iti baboy iti merkado ket P370-P390 pesos per kilo.
Kabayatanna, nakitaripnong met ni City Mayor Dong Gualberto kenni Mayor Francisco Fontanilla iti ili a Bacnotan, La Union tapno agbalin a normal ti suplay iti karne ditoy syudad ken maipababa pay ti presyo daytoy.
