LA UNION – Manipud Modified Enhanced Community Quarantine (MECQ) maipasidong iti syudad ti San Fernando, La Union iti General Community Quarantine (GCQ) epektibo inton bigat, Abril 24 agingga Mayo 7, 2021.
Maiyannurot daytoy iti Executive Order 16-2021 a pinirmaan ni Governor Pacoy Ortega idi malem kalman, Abril 22.
Ita nga aldaw ti Biyernes, Abril 23, nga agleppas iti 14-day a pannakaipasidong ti syudad iti MECQ ngem mangrugi inton bigat, maipasidong iti mas naluklukay a quarantine status a GCQ.
Daytoy iti napagnunumwan iti naisayangkat a panagtataripnong idi kalman dagiti local officials ti San Fernando, medical experts ken Provincial CoViD-19 Task Force.
Iti sidong ti GCQ, maiyannurot iti guidelines nga impaulog ti National Inter-Agency Task Force, limitado pay laeng iti garaw dagiti tattao, ngem maipalubosen iti operasyon dagiti opisina ti gobyerno ken non-essential services, limitado a public transportation, dagiti industriya iti 50 agingga 100 porsiyento a workforce, ngem istrikto latta a maipatungpal ti curfew hour ditoy syudad ken agtalinaed dagiti health safety protocols.
Maipalagip a naipasidong iti syudad ti San Fernando iti MECQ idi Abril 10 gaputi panagngato ti COVID 19 cases.
Makuna a dackel iti naitulong ti MECQ tapno malapdan iti panagwaras ti makaakar a sakit ken immadu iti bilang dagiti pasyente a nagrecover iti COVID 19.
Kabayatanna, base iti datus ti lokal a gobyerno iti COVID 19 idi kalman, Abril 22, adda iti maysa a nailista a baro a kaso ken 86 dagiti new recoveries.
Iti syudad iti agdama ket nakailistan iti 1,277 a confirmed cases ken 311 dagiti aktibo a kaso.
