LA UNION – Naminsan manen a naipasidong iti nair-irut a quarantine status iti syudad ti San Fernando.
Mangrugi ita nga aldaw ti Miyerkoles, Setyembre 8, 2021 nakaipasidong ti San Fernando City, La Union iti General Community Quarantine (GCQ) ken agpaut agingga Setyembre 22.
Maiyannurot daytoy iti Executive Order No. 129-2021 nga inyetnag ni City Mayor Herminigildo Gualberto ken iti bileg ti Executive Order No. 41 Series of 2021 nga impaulos met ni La Union Governor Francisco “Pacoy’ Ortega III.
Naipatungpal ti nasao nga addang iti panangikagumaan ti lokal a gobyerno a makontrol iti panagwaras ti Covid 19 ken dadduma pay a variants daytoy ken maibaba pay iti kaso wenno bilang dagiti makapkaptan ti nasao a sakit.
Iti syudad ket sigud a nakapasidong iti Modified General Community Quarantine (MGCQ), iti kalag-anan ken kalukayan a quarantine status ditoy pagilian.
