LA UNION – Naminsan manen a napadasan ti panaglayos iti kaadwan a lugar ditoy syudad ti San Fernando, La Union gapu iti agtultuloy a napigsa a tudo, a gapwanan ti southwest monsoon wenno nepnep.
Iti baetan ti ala 1:30 agingga alas 3:00 itay malem, saan manen a madalyasatan iti amin a klase ti behikulo iti national higway partikular iti monumento nga agpa-abagatan, gaputi napegges ken apagat-siket a kaadalem ti layos, a nagtaud iti naglupyas a creek.
Gaputi dayta, nagbirok dagiti motorista iti alternatibo a pagdalanan ket maysa ditoy iti Gov. Joaquin Ortega Avenue, tapno maliklikan ti adalem a layos.
Sumagmamano pay a paset ti diversion road partikular idiay Barangay Biday ti nairikep kadagiti light vehicles.
Dandani met iti luppo ti kangato ti layos iti kangrunaan a kalsada iti central business district ti syudad ken nalayos iti sumagmamano a pasdek negosyo ken pagtagilakwan.
Kabayatanna, agtultuloy iti isay-sayangkat a monitoring ti Disaster Risk Reduction and Management Office ditoy syudad tapno ipaayan ti tulong dagiti agkasapolan a residente nga apektado ti dakes a panawen.
Iti agdama, makapad-padas pay laeng ti panagtudtudo iti probinsya nupay bimmaban ti layos ken makadalyasat metten dagiti lugan iti national highway.
