Nagdudupudop dagiti turista ijiay ili ti San Juan, La Union itay napaut a ngudo ti lawas ti Labor Day para iti panagsubli ti “Labor Union Takeover,” uppat nga aldaw a selebrasion a pakairamanan dagiti coastal vibes, surf culture, ken live performances manipud kadagiti nadumaduma a nalatak nga artista.
Naangay ti nasao nga aktibidad idiay Urbiztondo Beach, espesipiko iti beachfront area iti sango ti Monaliza a pagaammo kas maysa kadagiti kangrunaan a destinasion dagiti surfers ken beachgoers iti rehion. Gapu iti daytoy, nakadkadlaw ti panagakar dagiti bisita manipud iti nadumaduma a paset ti pagilian a kayatda a padasen ti naisangsangayan a kombinasion ti musika, dalluyon, ken panagbiag iti rabii iti nadakamat a lugar.
Segun iti sumagmamano a turista, ti nadakamat a pasken ti maysa kadagiti rason no apay nga agtultuloy a nalatak ti San Juan kas travel destination no bakasion. Maysa kadakuada ni Miguel Rivera, maysa a turista manipud Laguna, a simmarungkar iti lugar iti maikatlo a gundaway. Inbinglayna na nga nagsubli isuna saan laeng a para iti surfing no di pay ket gapu iti nabiag nga ambiance ken naimas a taraon nga ituktukon dagiti lokal nga establisimiento.
Innayonna a napateg ti panagsagana dagiti bisita nangruna ita a napudot ti panawen. Binalakadanna dagiti padana a turista nga iyegda ti umdas a proteksion kontra iti pudot kas iti sunblock, sombrero, ken panaginum iti adu a danum tapno maliklikan ti dehydration bayat ti panangtagiragsakda kadagiti aktibidad iti ruar.
Kabayatanna, namnamaen ti lokal a gobierno ken negosiante iti nasao a lugar ti panagngato ti kita ti turismo gapu iti panagakar dagiti bisita. Agtultuloy met ti panangipalagip dagiti otoridad iti publiko a taginayonenda ti kinadalus ti aglawlaw ken surotenda dagiti naipatungpal a pagannurotan tapno masigurado ti kinatalged ken urnos ti tunggal maysa iti intero a selebrasion. (Report by Bombo Ericka)
