LA UNION – Umaboten iti P1.63 billion iti naibunong nga ayuda ti Department of Social Welfare and Development (DSWD)-Region 1 iti sidong ti Social Amelioration Program (SAP) iti rehiyon uno.
Manipud iti nasao a kantidad, pakabuklan a 296, 390 dagiti benificiaries a nalpasen a naikkan iti ayuda wenno kaibatugan ti 37.62 percent.
Ditoy La Union, iti pay laeng ili a Santol iti nakakumpleto ti pay-out ti SAP agsipudta rinugyan da idi pay semana santa.
Iti agdama, umaboten ti P247-M iti pondo a naibunong ti DSWD kadagiti 45,037 benificiaries ditoy La Union.
Iti eksklusibo a pannakiuman ti Bombo Radyo kenni Region-1 Information Officer Darwin Chan ti DSWD Field Office One, impaka-awat na kadagiti umili nga urayen laeng iti ayuda agsipudta agtultuloy iti panagtrabaho da kadwa da dagiti LGUs, tapno mabunongan dagiti maiparbeng laeng a maikkan.
Impaganetget na a kayat da a siguradwen a dagiti laeng umno ken kuwalipikado a benipisyaryo iti agnumar, isunga mangisay-sayangkat ti double validation dagiti barangay officials agsipudta saan da a kayat ti agbiddut amangan nu maikkan da iti saan a rumbeng a maipaayan.
Segun kenni Chan, nasken a malpas da ti pay out iti SAP agingga Huwebes, Abril 30, nga isuti intuding ti national government.
Segun pay kenni Chan, saan amin ket maikkan ti SAP agsipudta adda iti intuding a target benificiaries iti gobyerno iti tunggal rehiyon.
Nupay kasta, dagiti addaan ti query wenno salodsod ket mabalin da ti tumawag kadagiti nailanad a hotline nos. ti DSWD.
Maipalagip a ti SAP ket maysa a cash emergency subsidy program (ESP) wenno tulong pinansiyal para laeng kadagiti nakukurapay a pamilya a Pilipino, a kangrunaan a maap-apektaran iti maipatpatungpal nga enhanced community quarantine (ECQ) gapwanan ti COVID-19 global pandemic.
