Inlawlawag ti National Bureau of Investigation (NBI) a mabalin a pumanaw ti kontraktor a ni Sarah Discaya iti opisinada gapu ta awan pay ti naipaulog a warrant of arrest.
Segun kenni acting NBI Director Angelito Magno, awan ti legal a basaran tapno lappedan ni Discaya agingga nga awan ti order manipud iti korte.
Maipalagip a boluntario a simmuko ni Discaya idi napalabas a lawas kalpasan nga inwaragawag ni Presidente Ferdinand Marcos Jr. a manamnama a maipaulog iti warrant mainaig kadagiti maanomalia a flood control projects.
Inlawlawag ti kampo ni Discaya a ti panagsukona ket maysa a legal nga addang ken saan a panangaklon ti basol.
Sangsanguen ni Discaya karaman dagiti siam a dadduma pay iti kaso a malversation ken panaglabsing iti Anti-Graft and Corrupt Practices Act a mainaig iti maipagarup a P96.5-million Ghost Flood Control Project idiay Davao Occidental.#
