“Scubasurero ken coastal clean-up”,insayangkat ti Philippine Coast Guard ditoy San Fernando, La Union

Nangisayangkat ti Coast Guard District North Western Luzon (CGDNWLZN) iti Coastal Clean-up ken Scubasurero idiay Brgy. San Agustin ken Thunderbird Resort coastal area, San Fernando City, La Union idi kalman, Setiembre 16, 2023.

Maitunos daytoy iti pannakarambak ti Ocean Conservancy’s International Coastal Clean-up (ICC); National Maritime Week 2023; Maritime and Archipelagic Nation Awareness Month (MANA Mo 2023) ken iti Philippine Coast Guard 122nd Founding Anniversary.

Nakakolektar dagitoy iti nagduduma a basura kas iti upos ti sigarilio, plastics, tsinelas, fishing nets ken dadduma pay.

Ti aktibidad ket pammaneknek iti mandato ti Philippine Coast Guard a mangsalwad iti kinatalged ken kinadalus dagiti baybay.

Aktibo a nakipaset iti aktibidad dagiti personnel ti MEPFORCE-NWLZN, Operational Control Unit manipud CGDNWLZN; Coast Guard Auxiliary District-NWLZN; 704th Auxiliary Squadron, Coast Guard Station La Union ken Thunderbird Resort.