LA UNION — Itantandudo ti Gobierno Probinsial ti La Union ti baro a pagbiagan dagiti mangngalap babaen ti Seaweed Puto Technology Training nga addaan panggep a pagbalinen a livelihood product ti Gracilaria seaweed wenno “tamsaw”.
Indauluan ti Office of the Provincial Agriculturist ti dua nga aldaw a panagsanay a naisayangkat idi Hunio 17 agingga 18 idiay Barangay Rabon, Rosario, ken Hunio 24 agingga 25 idiay Barangay Paraoir, Balaoan. Dumanon iti 45 a nakipaset manipud iti Rabon Seaside Gracilaria Seaweed Association ken Women Aquatic Processors Association ti nakipaset iti panagsanay.
Malaksid iti panagaramid ti nasalun-at a seaweed puto, naisuro pay iti good manufacturing practices ken food safety standards tapno masigurado ti kalidad ken kinasagana ti produkto iti merkado.
Segun iti Gobierno Probinsial, ti nausar a teknolohia ket resulta ti panagsukisok ti Don Mariano Marcos Memorial State University-College of Fisheries. Dimmalan daytoy iti sensory evaluation ken nutritional analysis a nangpaneknek nga addaan daytoy kadagiti napateg a bitamina, iodine, mineral, ken dietary fiber.
Nangibinglay dagiti pannakabagi ti DMMMSU-South La Union Campus ti teknikal a pannakaammo, bayat nga immawat ti tunggal asosasion kadagiti starter kits a pakairamanan ti steamer, puto molders, stainless trays, ken kangrunaan a ramen iti panagaramid ti puto.
Panggep ti nasao a programa a palawaen iti pagbiagan dagiti mangngalap babaen ti panangaramat kadagiti lokal a gameng ti baybay ken moderno a teknolohia.###
