Kinontra ti security log ti Department of Public Works and Highways (DPWH) iti statement ni Batangas Representative Leandro Leviste a maipagarup a pimmanaw isuna iti opisina ti sigud a DPWH undersecretary Maria Catalina Cabral nga addaan ti imet a dokumento maipapan kadagiti nationwide budget insertions.
Segun kenni Leviste, impaima kenkuana ni Cabral dagiti papeles idi Septiembre 4, ngem segun ti DPWH Incident Log, awan ti napansin nga iggem a dokumento ni Leviste idi simrek ken rimmuar iti opisina ni Cabral. Ti laeng nadlaw dagiti guardia ket iti isasangpet ti maysa kadagiti kakaduana nga addaan ti imet nga innem a kahon ti pizza.
Nupay nakita ni Leviste a nakaiggem ti sumagmamano a pedaso ti papel kalpasan a dimmalan kadagiti dadduma nga opisina, impadamag dagiti guardia a pimmanaw isuna iti ahensia agarup 6:20 ti rabii nga awan ti imet na nga aniaman a dokumento, bayat a dagiti bodyguards ket addan bitbit a maysa a kahon ti pizza.
Rimmuar iti nasao a report bayat nga agtultuloy iti imbestigasion ti PNP iti pannakatay ni Cabral idi Disiembre 18.#
