LA UNION – Isagsaganan iti pulisya ti kaso a pammapatay kontra ti suspek iti pammaltog ti maysa a security guard idiay Barangay Ipet, ili ti Sudipen, La Union.
Nabigbig ti biktima a ni Areston Sumawang, 44, residente iti ili ti Gerona, Tarlac.
Base iti imbestigasyon ti Sudipen Police Station, sakbay a napasamak ti krimen ket maipagarup a nag-roving pay ti biktima iti banbantayanna a pasdek ti maysa a construction firm.
Naglinong ni Sumawang iti garahe gapu ti napigsa a panagbuyat ti tudo kasaruno iti pammaltog ti suspek a nabigbig iti nagan a Ronald Adayaw, 30, agnanaed idiay ili ti Pasil, Kailanga, ken agtrabtrabaho iti nasao a pasdek kas driver.
Maipagarup a naglugan iti bukodna a motorsiklo ti suspek kasaruno iti panaglibas daytoy kalpasan a maaramidna ti krimen.
Iti nabayagen a susik dagiti dua iti maipagarup a motibo ti pammapatay.
