Makasangsango da sigud a Presidente Rodrigo Roa Duterte ken Senador Bong Go ti nagtutuon a reklamo iti Office of the Ombudsman.
Nagturong ni Former Senator Antonio Trillanes IV iti opisina tapno personal nga idatag dagiti reklamo nga adda pakainaigan na iti panagkunniber ken korapsion.
Inreklamo na da Duterte ken Go iti panaglabsing ti Plunder Law a sagudayen ti Republic Act No. 7080, Anti-Graft and Corrupt Practices Act ii RA No. 3019 ken Code of Conduct for Public Officials ti RA No. 6713.
Nagtaud ti reklamo iti maibagbaga a pangipaay ti P7 billion worth infrastructure projects da Senador Bong Go ken sigud a Presidente Rodrigo Roa Duterte iti kompania a CLTG Builders a maipagarop a kukua ti ama ti senador.
Paset iti reklamo dagiti proyekto a nai-award sipud idi mayor pay laeng ni Duterte aginggana nagbalin a presidente.
Imbutaktak ni Trillanes a nausar kas natibker a basaran kas ebidensia dagiti aganay 200 a kontrata.
Imbilang na met kas ‘main plunderer’ ni Senador Bong Go ken ‘central figure’ iti amana, kasta met a kabsatna iti makinkukua ti CLTG Builders.
Innayon na pay nga iti posision ti Senador kangrunaan ti napalabas nga administrasion ni Duterte iti nangited dalan tapno maisayangkat iti panangipaay ti binilyon a gatad dagiti proyekto.
