Inbinglay ni Atty. Israelito Torreon, legal counsel ni Senador Ronald “Bato” Dela Rosa, a nakaala ti kampo-da ti impormasyon nga awan ti senador iti listaan ti Red Notice ti Interpol.
Segun kenni Torreon, awan ti nakaibasaranna ti nainget a pannakaaresto ni Dela Rosa gapu ta awan ti kliyentena iti nadakamat a listaan.
Innayonna pay a saan a mabalin a pagbasaran ti Section 17 ti Republic Act 9851, gapu ta awan ti nalawag a pagannurotan no kasano ti panangisuko ti maysa a tao iti International Criminal Court (ICC), kas kuma iti, ania a korte ti mabalin a pagturungan ti senador.
Mainaig iti daytoy, inadmitir ti abogado ni Dela Rosa nga iti laksid ti report nga awan ti kliyentena iti nasao a listaan ket kinunana nga ur-urayenda ti pormal a sertipikasion mainaig iti daytoy.
Kinuna pay ni Torreon nga awan pay ti komunikasionda kenni Dela Rosa manipud idi Mayo, nupay kasta, patienna nga adda pay laeng ditoy pagilian ti nasao nga senador.
