Sangsanguen ni Senador Ronald “Bato” Dela Rosa iti maysa nga ethics complaint kalpasan a saan nga dimmar-ay kadagiti sesion ti Senado iti las-ud ti nasurok tallo a bulan.
Nangipila ti pormal a reklamo iti anti-corruption group a “Wag Kang KuCorrupt” iti Senate Committee on Ethics and Privileges.
Impaganetget da nga iti napaut a kaawan ti nakatugaw a senador ket maibilang a “dereliction of duty” ken panangabuso iti panagtalek ti publiko.
Segun iti grupo, saan a rumbeng nga agtultuloy nga umuwat ti kompensasion manipud iti kaban ti pagilian iti maysa nga opisial ti gobierno no saanna a maar-aramid ti mandatona.
Impeksa met ni sigud a Senador Antonio Trillanes IV a mangipila met isuna ti ethics complaint kontra kenni Dela Rosa gapu iti nabayag a saan a panagparang iti Senado.
Kabayatanna, idi maika-64 a panagkasangayna idi Enero 2026, nangiruar isuna ti mensahe nga “alive and well” ken agur-uray ti “true justice”.
Kinontrana pay iti mapapati a “fake, foreign meddling” mainaig iti imbestigasion ti International Criminal Court (ICC) iti kaso a crimes against humanity a mainaig iti kampania kontra droga ti Duterte Administration.
Segun kadagiti report, talantanen ti Senate Committee on Ethics and Privileges inton sumaruno a lawas iti reklamo kontra kenni Dela Rosa tapno maammuan no adda ti umdas a basaran para iti naun-uneg nga imbestigasion.
Maipalagip a ni Dela Rosa ket saanen a nagpakita iti publiko manipud idi Nobiembre 2025, kalpasan dagiti report nga isu ket imbestigaran ti ICC.
Ti napaut a kaawanna ket nangpataud iti panagbuteng iti dadduma a sektor a mabalin a maapektaran iti integridad ti Senado ken ti panagtalek ti publiko kadagiti nabutosan nga opisial ti gobierno.###
