Indatag ni Senador Risa Hontivero iti resolusyon a mangipaay-pammadayaw kadagiti Senate reporters/media a nang-cover ti shooting incident idi Miyerkules, Mayo 13.
Iti Senate Resolution 400, maikkan ti commendation iti Senate media gapu ti impakitada a kinatured ken professionalism iti panang-cover ti insidente.
Nadakamat iti resolusyon iti tallo a minuto a pinnaltog a nangigubuay ti panic, saan laeng a kadagiti empleyado ti Senado no di ket pati pay kadagiti miembro ti media nga adda iti uneg ti pasdek.
Nakalanad met a tallo nga aldaw nga incover ti media iti standoff iti nagbaetan dagiti otoridad ken ti Senate leadership mainaig iti kustodiya ni Senador Ronald “Bato” dela Rosa.
Laksid ti peggad iti uneg ken ruar ti pasdek, nangipakita ti kinatured dagiti Senate media ken intultuloy iti panagipadamag para iti right to information ti publiko.
Segun pay iti resolusion, iti tengnga ti panagwaras ti online disinformation ken covert influence operations, agseserbi a napateg nga adigi ti kinapudno iti patas a panagipadamag ti Senate media iti panawen ti national crisis.###
