Dinepensaan ni Senador Imee Marcos nga awan ti atrasan na iti rekomendasyon na kadagiti kongresista a sukatan da ni House Speaker Martin Romualdez imbes nga itandudo ti impeachment ni Bise Presidente Sara Duterte.
Inlawlawag ti Senadora a suhesyon na laeng daitoy kadagiti kongresista gapo iti panagpunterya ti uray siasino a kabaelan da nga i-impeach ken impaganetget a saan da a bibyangan ti pinili ti tao.
Sakbayna ket inrekomendar ni Sen. Marcos ti panagsukat ti baro a Speaker ti Kamara de Representantes kasaruno ti botos a panagpabor tapno i-archive ti articles of impeachment kontra kenni Bise Presidente Sara Duterte idiay Senado.
Gapo iti dayta ket sumagmamano a lider ti Kamara ti nangbabalaw iti suhesyon na.
Maysa kadagiti nangbabalaw ket ni House Deputy Speaker David Suarez a nagkuna nga awan ti siasinoman a Senador ti adda karbengan na a diktaran nu sino ti agbalin a lider ti Kamara ken innayon a nakadepende laeng ti desisyon kadagiti nabotosan a miembro.
Kinuna pay ti kongresista a nagtignay ni House Speaker Romualdez a maiyannurot iti konstitusyon idi indauloan na ti panag-transmit ti articles of impeachment kontra kenni VP Sara tapno masigurado ti accountability.
