Inakusaran ni Senador Imee Marcos ti administrasion a mapapati a makibiang iti affairs ti Senado kalpasan a nagsao kano ni Presidente Ferdinand Marcos Jr. mainaig iti kontrobersial nga online voting proposal para kadagiti senador.
Iti mensahena iti viber idi Biernes, Mayo 29, kinuna ti presidential sister nga “halatado unay” ti ar-aramiden ti administrasion maibusor iti majority bloc ti Senado.
Sakbayna, kinontra ti Presidente ti singasing a mabaliwan ti pagannurotan ti Senado tapno mapalubosan ti online voting. Segun kenkuana, kasla naaramid laeng ti nasao a singasing tapno mapalubosan ni Senador Ronald “Bato” dela Rosa a makipaset uray no sapsapulen dagiti otoridad.
Kinuna pay ti Presidente a kasla ni laeng Dela Rosa ti magunggonaan iti kastoy a singasing.
Para kenni Senador Marcos, dagiti kasta a sasao ket mabalin a maibilang a “nalawag a panagraut kadagiti konstitusional a beddeng iti nagbaetan ti ehekutibo ken lehislatibo,” wenno nalawag a panaglabsing iti beddeng ti bileg ti ehekutibo ken lehislatura.
Agingga ita, awan pay ti opisial a sungbat ti Malacañang mainaig kadagiti palawag ni Senador Imee.
