Boluntaryo a simmuko idi kalman, Hunyo uno, ni Sen. Jinggoy Estrada iti Criminal Investigation and Detection Group (CIDG) kalpasan a mangirwar ti Sandiganbayan ti maikadwa a warrant of arrest kontra kenkuana para iti kaso a plunder a saan a mabalin a mapiyansaan.
Iti warrant ket mainaig iti maipagarop a P573-milyon a flood control projects a maipapati a nalaokan ti kickback schemes.
Daytoy ti maikadwa a warrant a nairuar kontra kenni Estrada iti uneg laeng ti uppat nga aldaw.
Immuna a nagbayad ti piyansa para iti kaso na a graft, ngem iti baro a kaso na a plunder ket maysa a panaglabsing iti linteg nga unbailable.
Iti press conference idi malem kalman, inbutaktak ni Senator Jinggoy Estrada a maipagarop nga adda nangidiaya kenkuana a tallikudan iti ‘independent majority bloc’ kasukat ti kaso na wenno pannakairamanna iti flood control scandal.
Ngem impaganetget ni Estrada nga agtalinaed isuna iti biang ti majority ken nakasagana a mangsango iti kaso tapno dalusan ti nagan na.
Iti nasao pay laeng a presscon na idi kalman, impaganetget ni Estrada a saan na nga usaren iti Senado kas panangga kontra kadagiti alegasyon.
Kinuna na a karbengan na a mangidatag ti motion for reconsideration agsipudta nabiit pay a naawat na iti Ombudsman Resolution.
Innayon ti senador, a mangnamnama iti patas a panangtrato, due process, ken awan ti mapab-paboran iti panagdengngeg ti kaso.
Daytoy metten ti maikatlo a gundaway a nakaswan ti plunder ni Estrada sa kasong plunder.
Immuna iti jueteng case kadwa na ti ama na a ni sigud a Presidente Joseph Estrada, ngem na-acquit idi 2007.
Maikadwa iti PDAF case ken naabsuwelto idi 2024.
