LA UNION – Iti laksid ti pannakabingay dagiti supporters ni Pangulo Rodrigo Duterte iti sidong ti PDP-Laban ket agtaltalinaed pay laeng a sibubukel iti talek dagiti miyembro ti partido idiay probinsya ti La Union.
Iti pannakiuman ti Bombo Radyo kenni La Union Provincial Councilor Atty. Reynaldo Mosuela, kinunana a kas nabayagen a kameng iti PDP-Laban iti probinsya ket ni Sen. Koko Pimentel iti bigbigenda a pangulo iti sibubukel a partido iti pagilyan.
Sigun kenni Mosuela, uray ni La Union Gov. Pacoy Ortega III a tumaktakder kas lider iti partido karaman dagiti dadduma pay a miyembro daytoy iti probinsya ket suportadoda ni Pimentel.
Kinuna pay ni Mosuela, a nawaya met iti amin nga adda iti lubong ti politika a mangbukel iti bukod a partido ken agparehistro iti Comelec, ngem saan a nasken nga aramaten dagiti nagtataripnong idiay Quezon City iti nagan ti PDP-Laban wenno ibagada nga isuda ket lihetimo a miyembro.
Immuna iti daytoy, idi aldaw ti Byernes kagiddan iti national assembly idiay syudad ti Quezon ket nabutusan kas pangulo iti faction ti PDP-Laban a ni Atty. Rogelio Garcia tapno sukatan ni Pimentel idi aldaw ti Byernes.
