Pinaglibakan ni Sen. Panfilo “Ping” Lacson a ginagara a naituding ti P50-milyon a pabuya ken ultimatum iti panagsuko kenni Sen. Ronald “Bato” dela Rosa tapnu malappedan daitoy a makabotos iti impeachment trial ni Vice President Sara Duterte.
Segun kenni Lacson, patta-patta laeng dagiti alegasyon a tarigagay ti addang ti gobierno a maapektaran iti panagbotos ti impeachment case kontra iti bise presidente.
Inlawlawag ti Senador nga iti agdama ket saanen a sakup ti bileg a mangipatungpal ti panagpilit a dumar-ay ti impeachment court ni Dela Rosa, maibasar iti umuna a desision ti impeachment court mainaig iti saritaan ti kasapulan a botos para iti conviction.
Iti sidong ti nasao a desision, iti 2/3 a botos tapnu masentensiaan ti maysa nga opisyal ket maibatay laeng kadagiti senador a legal ken aktuwal a mabalin a makipaset iti panagusig. Saan a karaman iti bilang dagiti saan a makadar-ay gapu kadagiti sitwasyon kas ti panaglimmeng kadagiti otoridad ken saan a maamwan a lokasion daitoy.
Iti agdama, aglimlimmeng ni Dela Rosa kalpasan a mapaulugan ti warrant of arrest manipud International Criminal Court (ICC) mainaig ti kampanya kontra droga idi administrasyon ni sigud a Presidente Rodrigo Duterte.
Kinuna ni Lacson, narigat para kenni Dela Rosa a makadar-ay iti impeachment trial wenno bumotos a saan nga agpegpeggad a maarestar.
Dinakamatna ti itatabuno ni Dela Rosa iti Senado idi Mayo 11 tapno ibutos ni Sen. Alan Peter Cayetano iti eleksion ti presidente ti Senado. Nupay kasta, mapapati a nagtalaw ni Dela Rosa iti Senado kalpasan ti pannakapaltog iti uneg ti pasdek idi Mayo 13.
Impakdaar ni Lacson a no mapan manen iti Senado tapno laeng agbotos, sobra panagsugal na daitoy ti bagbagi nan.
Kinunana a no mabalin a makipaset ni Dela Rosa nga awan ti mapaspasamak a pannakaaresto ket mangpataud daytoy kadagiti saludsod maipapan iti kinaepisiente dagiti pannakabagi ti linteg.
