Kwinestion ni Senador-Judge Robin Padilla no apay a mapagbalin nga isyu iti impeachment trial ni Bise Presidente Sara Duterte ti panagbiahe ti immun-una a defense witness idiay China.
Napasamak daytoy idi Huebes, iti maika-43 nga aldaw ti impeachment trial ni Bise Presidente Sara Duterte.
Imbinglay ni Padilla a namindua a napan isuna idiay China, pakairamanan ti naminsan a kaduana ni sigud a Presidente Rodrigo Duterte.
Nupay kasta, inaminna a saanna met a nalagip no ania dagiti lugar a napananda.
Segun kenni Padilla, uray isuna ket masapul a kiddawenna kadagiti staff-na tapno maammuanda no sadino ti nagnaanna idiay China gapu ta saannan a malagip dagiti lugar a sinarungkaranna.
Inlawlawag ni House prosecutor Rep. Terry Ridon a saan nga aktual a mapan idiay China ti kweskwestionen ti prosecution no di ket dagiti sungbat ti saksi a kunana nga adda pakainaiganna iti kredibilidadna.
Inlawlawag ni Ridon a namin-adu a saan a direkta a sinungbatan ti saksi dagiti saludsod maipapan iti panagbiahe, ket masapul nga ipaay ti senador-judge ti kanayonan a detalye sakbay a pasingkedanna ti sumagmamano nga impormasion.
Iti biang ni Padilla, impapilitna a rumbeng met a maikonsiderar dagiti saksi a mangibagbaga a dida malagip ti sumagmamano a detalye.
Maipalagip a pinagduaduaan ti prosecution ken sumagmamano a senador ti sigud a saksi ti depensa a ni Davao City Assessor Jaime Adalin maipapan iti panagbiahena idiay China, agraman ti ipapanna idiay Beijing ken panagawidna manipud Shanghai.
