BR LA UNION – Maipagarop nga adda dagiti kontra idiay Kamara nga i-livestream iti bicameral conference committee meeting ti dua a pagpandayan linteg ti Kongreso seknan iti gakat a 2026 National Budget.
Daytoy ti imbatad ni Senador Erwin Tulfo, vice chairman ti Senate Committee on Finance.
Segun kenni Tulfo, imbaga ni Senate President Vicente Sotto III, a maipagarop nga adda napasamak a diskusyon seknan iti daytoy.
Inlawlawag ni Tulfo a tuloy ti pannakaisapubliko ti bicameral meeting iti 2026 budget nupay adda panagkedked iti counterpart da idiay Kamara.
Impaganetget pay ti senador, a ti national budget ket saan a kuwarta dagiti senador wenno congressman isunga saan a rumbeng nga ilimined nu kasatnu a masukimat ti pondo ti ili.
Kinuna na a kasapolan a makibiang dagiti umili gaputa kuwestiyonable iti budget.
