BR LA UNION – Impaganetget ni University of the Philippines College of Law professor Theodore Te nga adda track record iti Senado a mang-protektar kadagiti miyembro daytoy, malaksid laeng kenni sigud a Sen. Leila De Lima.
Daytoy ket sungbat iti salodsod nu mabalin a kumiddaw ni Sen. Ronald Dela Rosa ti proteksyon idiay Senado manipud iti panang-arestar ti International Criminal Court, nu maiyulog met ti warrant of arrest kontra kenkuana.
Iti maysa a forum nga inorganisar ti University of the Philippines College of Law, imbaga ti sigud a pannakangiwat ti Korte Suprema iti track record ti Senado a panangipaay iti proteksiyon kadagiti miyembro daytoy, malaksid kenni sigud a Sen. De Lima a naibalud iti uneg ti Philippine National Police custodial center iti uneg ti innem a tawen.
Inyarig pay ti abogado iti probisyon ti Konstitusyon a mangipaay iti proteksiyon kadagiti senador manipud iti pannakaaresto bayat ti sesyon, no sumang-sango dagitoy iti kaso nga addaan ti dusa a saan a lumbes ti 6 a tawen.
Nupay kasta, impaganetget ti beterano nga abogado nga adda sumagmamano a sensitibo nga isyu a masapul a tamingen ditoy.
Umuna ket no saan a naka-sesyon ti Senado a kas iti agdama a kasasaad.
Maikadua ti arrest warrant nga inruar ti International Criminal Court. Iti nasao a warrant, kinunana, saan pay a naikeddeng ti dusa (predetermined penalty) ken mairuar laeng kalpasan ti pannakadengngeg ti kaso.
Iti laksid daytoy, kinunana, agpar-parang a kabaelan ti Senado a salakniban dagiti miyembro nga addaan iti warrant, maibasar met iti track record ti upper house.
Kalpasan ti immuna a pannakaaresto ni sigud a President Rodrigo Duterte ita a lawas, kinuna ni Sen. Ronald Dela Rosa a no rummuar ti arrest warrant-na ket ipatiliw ti gobiyerno ti Pilipinas, kiddawenna ti proteksiyon ti Senado kas maysa nga institusyon.
Nupay kasta, kinunana, no ibaga ti Senado a saan a kabaelan, sitatalna nga isukona ti bagina.
