Nagdesisyon iti Senado nga ipaigid pay laeng iti impeachment case kontra kenni Bise Presidente Sara Duterte.
Iti nasao nga addang ket kas sungbat iti executory decision ti Korte Suprema iti panangibasura iti impeachment.
Nagbotos kas pabor dagiti 19 a Senador bayat nga uppat dagiti kimontra, ken maysa iti nag-abstain.
Dagiti nagbotos ti pabor ket isuda: Senador-Alan Peter Cayetano, Pia Cayetano, Ronald Dela Rosa, JV Ejercito, Francis Escudero, Jinggoy Estrada, Sherwin Gatchalian, Bong Go, Lito Lapid, Loren Legarda, Rodante Marcoleta, Imee Marcos, Robinhood Padilla, Erwin Tulfo, Raffy Tulfo, Joel Villanueva, Camille Villar, Mark Villar, ken Juan Miguel Zubiri.
Dagiti met nagbotos a kontra ket isuda: Senator Paolo Benigno “Bam” Aquino IV, Risa Hontiveros, Francis “Kiko” Pangilinan, ken Sen. Vicente “Tito” Sotto III, bayta a nag-abstain ni Sen. Panfilo Lacson.
Maipalagip nga immunan a kiniddaw ni Senador Marcoleta nga ibasura iti impeachment case kontra kenni Bise Presidente Duterte.
Immuna metten nga inlawlawag ni Senador Alan Peter Cayetano nga iti panangikabil iti archive iti impeachment case kontra iti Bise Presidente ket saan na kayat a satwen a natay daytoyen ken mabalin pay a maguyod no kaspangarigan baliktaden ti Korte Suprema iti desisyon daytoy.#
