BR LA UNION – Pormal nga ag-convene ti Senado kas impeachment court inton Mayo 18, 2026 tapno rugyan a denggen iti kaso nga impeachment kontra kenni Vice President Sara Duterte, segun kenni Senate President Alan Peter Cayetano idi Huwebes.
Iti surat ni Cayetano kenni House Speaker Faustino Dy III a napetsaan ti Mayo 14, kinumpirma na ti pannaka-awat ti Senado iti articles of impeachment ken dagiti dokumento nga impatulod ti Kamara de Representantes idi rabii ti Mayo 13.
Segun kenni Cayetano, maaramid ti panag-convene ti impeachment court iti oras alas-3 ti malem, maiyannurot iti Senate Rules of Procedure on Impeachment Trials ken iti mandato ti Konstitusyon.
Sumangsango ni Duterte iti reklamo nga adda pakainaiganna iti maipagarop a biddut a panangusar ti pondo ti publiko, saan a mailawlawag a kinabaknang, ken panagpangta kontra iti presidente ken First Lady.
Binilin metten ni Cayetano iti Senate Secretariat nga iran ti articles of impeachment iti Calendar for Ordinary Business para iti pormal a referral iti impeachment court.
Innayon na a mangirwar ti Senado iti iskedyul para iti panagsango ti agsumbangir a benneg kadagiti sumaganad nga aldaw.
Laksid ti nakatuding a panag-convene ti senado kas impeachment court inton Mayo 18, imbaga ni Cayetano a posible nga inton Hulyo a mangrugi da iti aktuwal a panagusig depende kadagiti naituding a proseso ken bilang ti session days.
Impaganetget pay ni Cayetano a suruten ti Senado iti agraraira a linteg ken awan kunana ti pannakaitantan iti proseso ti impeachment.
Kagiddan daytoy, pinaglibakanna dagiti ispekulasyon nga adda pakainiganna iti panagbaliw ti liderato idiay Senado iti maipagarop a plano a lapdan wenno itantan ti impeachment trial kontra kenni Duterte.
