Posible a mangiruar ti resolusyon iti Senado mainaig ti karit ti Chinese Embassy kadagiti mammanday-linteg nga ideklara a persona non grata ni Chinese Ambassador to the Philippines Jing Quan gapu kadagiti waragawag na kontra iti Pilipinas.
Segun kenni Sen. Joseph Victor “JV” Ejercito idi Domingo, pagsasaritaan dagiti senador iti posibilidad a mangiruar ti resolusyon kasaruno ti nagbalin a waragawag ti embahador a maipagarop a nalaka nga abaken ti China iti Pilipinas nu mangusar daytoy ti puwersa mainaig iti saritaan iti West Philippine Sea.
Inladawan ni Ejercito kas “very rude, hostile, and undiplomatic” dagiti waragawag ni Jing, a nangkuna a mas pilpilien ti China iti kinakapya laksid a mangusar ti puwersa.
Para iti senador, nasaysayaat a sukatanen ti Beijing iti embahador nu seryoso daytoy a pasayaaten iti relasyon ti dua a pagilian.
Kinuna na, saan a makatulong dagiti kapada a waragawag ken lalo laeng a mangpakaro iti tensiyon.
Kabayatanna, kinarit met ti Chinese Embassy dagiti mammanday-linteg nga itandudo ti nasao nga addang.
