Nainget a pinaglibakan ni Senador Alan Peter Cayetano iti alegasion nga adda ti anomalya kadagiti infrastructure project idiay Taguig City, kasaruno ti panagsubmitir ni Senador Panfilo Lacson iti Office of the Ombudsman ti documentary ken testimonial evidence mainaig ti maipagarup nga iregularidad kadagiti nasao a proyekto.
Segun kenni Cayetano, awan ti ghost wenno maanomalya a proyekto idiay Taguig ken nakasagana isuna a sangwen iti aniaman nga imbestigasion.
Ti statement na iti social media, pinagyamanan na met dagiti residente ti siyudad iti agtultuloy a panagtalek ken suporta.
Kabayatanna, kenuna ni Lacson a mangipila pay isuna ti kanayunan nga ebidensia iti manamnama a panagdingngeg ti Senate Blue Ribbon Committee seknan iti isyu, malaksid kadagiti dokumento nga immunan nga inpasa na iti Ombudsman.
Impaganetget met ni Cayetano a saan a rumbeng nga ipada iti alegasion idiay Taguig kadagiti isyu nga adda pakainaigan na kadagiti flood control projects idiay Bulacan, ken mamati isuna a rumuar to iti kinapudno babaen ti umno a proseso.###
