Nagpanawagan ni Senate Minority Leader Alan Peter Cayetano iti baro a Department of Health (DOH) Secretary a ni Dr. Jose “Brix” Pujalte Jr. nga iyadayo iti ahensia manipud iti pulitika tapno masigurado iti nasaysayaat ken episiente a panangipaay ti serbisio pangsalun-at iti publiko.
Segun kenni Cayetano, namnamaenna a ti baro a liderato iti ahensia ket agserbi a pangrugian dagiti dadakkel a reporma ken mangidatag iti natibker a pundasion para iti nasaysayaat nga healthcare system para kadagiti amin a Pilipino.
Ti panawagan ket kasaruno iti panangidutok ni Presidente Ferdinand Marcos Jr. kenni Pujalte kas sekretario ti DOH kasukat ni Dr. Teodoro Herbosa, a nagikkat iti puesto gapu ti rason maipapan iti salun-at.
Ni Pujalte ket maysa a beterano nga orthopedic surgeon ken sigud a presidente ti Philippine Orthopedic Center nga addaan ti nasurok a tallo a dekada a kapadasan kas doktor, administrador ti ospital, mannursuro, ken public servant.###
