BR LA UNION – Kinumpirma mismo ni Senador Ronald “Bato” dela Rosa idi kalman, Marso 12, iti maysa a phone call interview nga adda ditoy Pilipinas ken saan isuna nga aglemmeng.
Iti palawag ni Dela Rosa ket kalpasan nga inaresto dagiti otoridad ni sigud a Presidente Rodrigo Duterte maibasar iti warrant for crimes against humanity ti International Criminal Court.
Segun kenni dela Rosa, makumikom nga agkampanya ken kalkalpasna laeng ti nagkampanya iti kabambantayan idiay Surigao ken Agusan.
Inlawlawag ti senador nga inggagarana nga iddepen ti teleponona gaputa makumikom daytoy a mangas-asikaso iti petition for certiorari and prohibition a naipila itay nabiit idiay Korte Suprema.
Kinunana nga isu ti nadutukan a mangasikaso kadagiti legal a remedyo iti korte, isunga saan a nakasurot idiay Hong Kong.
