Nainget a pinaglibakan ni Senador Robin Padilla iti alegasion a limed-na nga inruar ni Senador Ronald “Bato” dela Rosa manipud iti Senado kalpasan iti tensionado nga insidente idi napalabas a lawas.
Segun kenni Padilla, normal-da a pimmanaw idiay Senado ken imposible a maaddaan ti panagtakas gapu ta nainget iti seguridad, adda ti presensia ti pulis, ken ado dagiti CCTV cameras iti aglawlaw.
Nagtalinaed isuna idiay Senado tapno kaduaen ni dela Rosa bayat a bumarbara iti sitwasion mainaig ti liderato ken impeachment proceedings.
Nagbalin a nadagsen iti atmospera idiay Senado kalpasan iti insidente ti pammaltog iti makinbaba a paset ti pasdek.
Maipagarup a pinanunot met kano ni dela Rosa iti kinatalged dagiti tattao idiay Senado, karaman dagiti media ken empleyado, kasta met a nakitaripnong kada Interior Secretary Jonvic Remulla ken PNP Chief Jose Melencio Nartatez Jr. tapno siguraduen iti kinaurnos.
Impaganetget pay ti senador nga awan ti nakitada a warrant of arrest isu nga awan ti rason tapno panunuten nga adda ti operasion a panag-aresto kontra kenni dela Rosa.
Inlawlawag na met a nakisabay laeng ni dela Rosa iti lugan-na paawid ken bimmaba idiay Makati a nangsunduan ti bukod-na a lugan.
Kagiddan ditoy ket kinuestion ni Padilla iti panangawag kenni dela Rosa a “pugante” ken nagpanawagan a saan a gaburan ti pulitika dagiti napapateg nga isyu kas iti trabaho, sahod, ken korapsyon.
