Nadakamaten idiay plenaryo ti Senado ti Senate Concurrent Resolution No. 4 a panggep nga aramiden a natibtibker ken nalawlawag ti proseso ti national budget babaen ti panangipalinteg wenno panag-institutionalize ti nainget a pannakaipatungpal ti transparency ken accountability measures.
Babaen iti daitoy a resolusyo, amin a dokumentong nga adda pakainaigan na ti budget a nagtaud kadagiti singasing a pondo dagiti nagduduma nga ahensya, resulta dagiti hearings, records ti bicameral conference, agingga pinal a bersyon ti General Appropriations Bill ket nasken a maipablaak kadagiti official websites ti Senado ken Kamara sakbay a maisubmitir iti Presidente.
Nairanta daitoy tapno agbalin a silulukat iti publiko dagiti napapateg nga impormasyon ken maisali dagiti umili iti panangdakamat ti 2026 national budget. Iti kastoy a wagas ket masigurado a tunggal piso ti baknang ti pagilian ket maus-usar a nasayaat ken nakalinya kadagiti kangrunaan a pagkasapulan ti pagilian.
Segun kenni Senate Committee on Finance Chairman Senador Sherwin Gatchalian, rugrugi daitoyen ti inawagan na kas “golden age of transparency and accountability.”
Kinunana a saan na nga ipalubos dagiti kanayunan nga alokasyon a maisingingit nga awanan met iti umdas a pagbasaran ken agbalinen a nainget ti Senado ti panagadal ti kiddaw para kadagiti confidential funds dagiti ahensya ti gobierno.
