Nangipaulog ni Senate Impeachment Court presiding officer Chiz Escudero ti ruling mainaig iti mapapati a panaglabsing iti sub judice rule kalpasan ti viral post ni Atty. Amando Ligutan maipapan kadagiti misleading a saludsod iti impeachment trial.
Iti nasao a pangngeddeng, impalagip ni Escudero kadagiti senador-judges a taginayonenda iti impartiality, political neutrality ken umno a judicial decorum, maitunos iti Konstitusion ken dagiti linteg.
Impaganetget na pay iti nainget a pannakaipatungpal ti Rule 18 ti Senate Impeachment Court, a mangiparit kadagiti senador-judges, prosecution and defense lawyers, ken respondents a mangdiskusion iti publiko iti merito ti kaso bayat nga agtultuloy iti panagusig.
Napakdaaran met dagiti senador-judge kontra kadagiti statement wenno personal attack a mabalin a mangpakaro iti riri ken mangdadael iti dignidad ti korte.
Para iti umuna a panaglabsing iti Rule 18, maipatungpal ti reprimand ken admonition wenno pormal a panaglabsing iti sango ti korte. Iti maikadua a panaglabsing, adda ti ₱30,000 a multa, idinto nga adda pay ti nayonna a dusa kadagiti sumaruno a violation.###
