Sinuspendir pay laeng ti Senate Blue Ribbon Committee iti imbestigasion kadagiti maanomalya a flood control projects.
Segun kenni Senador Panfilo Lacson, awan ti maisayangkat a panagdingeg inton sumaruno a lawas kalpasan a maamuan a saan pay a nakasagana dagiti kasapulan da a dokumento manipud ti Department of Justice ken Manila Regional Trial Court.
Maisayangkat kuma iti panagdingeg ti panel inton Oktubre 8, nga orihinal a naituding iti kiddaw ni Senador JV Ejercito tapno ipaayab ni sigud a DPWH Regional Director IV-B Engineer Gerald A. Pacanan.
Innayon na pay, iti aggiddan a panagdingeg para iti budget ken Commission on Appointments ket mangigubuay ti conflict iti schedule ti lupon.
Gapo iti daytoy ket impakaammo ni Lacson kenni Senate Presidente “Tito” Sotto III iti temporario a panangkanselar ti panagdingeg aginggana maaddaan ti umno a panawen ken kumpleto a dokumentasion.###
