BR LA UNION – Maibilang itan ni Senador Ronald “Bato” dela Rosa kas “armado ken delikado” iti tengnga ti maipatpatungpal nga standard protocols iti tengnga ti agtultuloy a panangsapol kenkuana tapno iserbi iti arrest warrant nga inyisyu ti International Criminal Court (ICC).
Daytoy ti nagbalin a sungbat ni National Bureau of Investigation (NBI) Director Melvin Matibag idi masalodsod nu maibilangen ti senador nga armado ken delikado kalpasan a pimmanaw iti premises ti Senado idi parbangon ti Mayo 14 kasaruno ti shooting incident ken saan nga ammo nu sadino ti ayanna ita.
Inlawlawag pay ti NBI chief a paset ti standard protocol, a nu mangisayangkat da ti operasyon wenno adda sap-sapolen a pugante, ibilang da daytoy nga armado ken delikado.
Immunan a nangbukel ti NBI ti maysa a grupo a mangsapol iti senador, a maysa itan a pugante.
Binilin metten ni Matibag dagiti kameng iti district ken regional offices ti NBI a mangisayangkat ti bukod a monitoring iti masakopan da a lugar para iti posible a lead a makaitudo iti lokasyon ti senador.
Mamati ni Matibag nga ammo ni dela Rosa nu kasatnu nga agtignay dagiti otoridad ken kasatnu isuna a matunton, gaputa nagserbi a hepe ti Philippine National Police (PNP).
