Siniguro ni Senator Risa Hontiveros a nainget na a bantayan ken sukimaten dagiti unprogrammed ken inserted funds iti gakat a ₱7.2-trillion 2027 national budget tapno saan nga agserbi daytoy a “discretionary funds” wenno mausar iti bukod nga interes ti siasinuman nga opisyal.
Ti nasao a waragawag ti senadora ket kasaruno iti inaramid a desisyon ti Korte Suprema a nangideklara iti sumagmamano nga unprogrammed appropriations iti naglabas a budget kas unconstitutional gapu iti kaawan ti naan-anay a transparency ken safeguards.
Impaganetget ni Hontiveros nga iti napalabas a deliberasyon, adda dagiti pondo manipud foreign-assisted projects a naikkat ngem naiyakar iti unappropriated wenno unprogrammed programs.
Duktalen iti senadora nu adda manen ti nadullit iti nasao nga iskema iti 2027 budget ken anya dagiti partikular a kondisyon iti panangusar daytoy.
Kinuwestiyon ti senadora iti dakkel a naikissay iti pondo nga adda direkta a pagnumaran dagiti umili, partikular iti ₱4 bilyon a kissay iti Health Facilities Enhancement Program ken ₱1 bilyon a kissay iti immunization program ti pagilian.
Segun kenkuana, saan a naingkalintegan dagiti nasao a panagkissay, nangruna ket nasurok a 30 a probinsiya ditoy Pilipinas iti awanan pay laeng ti kabukbukodan a provincial hospital nga iman-manehar ti Department of Health (DOH).
Impaganetget pay ni Hontiveros a ti nairut a panang-repaso na iti national budget ket nakatutok iti umno nga alokasyon para iti publiko ken saan a base iti isyu ti impeachment trial wenno kas “bargaining chip” kontra kenni Vice President Sara Duterte.
