BR LA UNION – Inamiris dagiti Senator-judge iti nagsasaruno a transaksiyon seknan iti nasurok P96 milyon a nagtaud iti joint account dagiti ag-ama a Rodrigo Duterte ken Vice President Sara Duterte a namin-adu a daras a nausar kas manager’s checks.
Iti palawag ni Marwin Galvez, division head ti maysa a bangko, nu inusar ti nasao a pondo a paggatang ti manager’s check, saanen a mairaman iti balanse ti naggapwan na nga account ngem agtalinaed nga outstanding ti tseke.
Nupay kasta, agtaltalinaed ti kuwarta iti settlement account ti bangko para iti manager’s checks.
Impakita ti prosekusyon iti records ti dua a time deposit nga agbalor ti nasurok-kumurang a P41 milyon ken P55 milyon.
Segun kenni Prosecutor Atty. James Bryan Ibrahim Alih, nausar dagitoy tapno mangala ti manager’s checks a saan a dagus a na-encash, ngem idi agangay ket naisubli ken nasukatan ti baro a tseke.
Umabot iti innem a nagsasaruno a cycle ti nasao a transaksiyon manipud 2011 agingga 2013.
Inawagan a “tinikling” ni Senator-judge Vicente Sotto III, maibasar iti maipagarop a panangiladawan ti maysa a banker iti paulit-ulit a panag-isyu, saan a panangusar ken panangisubli ti manager’s checks.
