LA UNION – Mapalubosanen dagiti nataengan nga agtawen ti 60 nga agpangato a rumuar iti babbalay da idiay Rosario, La Union.
Maiyannurot daytoy iti nairuar a pammilin manipud lokal a gobyerno nga EO No. 65 ken pinirmaan ni Mayor Bellarmin Flores.
Daytoy ket kalpasan a nangipaulog ti Department of Interior and Local Gov’t. (DILG) iti Memorandum Circular No. 2020-110 idi Agosto 17, para iti mobility wenno panaggaraw dagiti senior citizens iti agdama a sitwasyon ken iti akmen a trabaho ti Office for Senior Citizens Affairs (OSCA).
Kabuyog ti nasao a pammalubos dagiti maipatungpal nga allagaden ken panangsurot dagiti Miminum Health and Hygiene Standards, nga impaulog ti Inter Agency Task Force for the Management of Infectious Diseases (IATF-EID).
Iti nasao a pammilin, dagiti nataengan a mapalubosan a rumuar iti babbalay da ket dagiti addaan nasisita a gagara iti ruar, kas koma iti panaggatang ti agas, essential goods ken services, ken dagiti agtrab-trabaho kadagiti naglukaten nga industriya wenno establisimento ita a quarantine situation.
Tapno makaruar dagiti senior citizen, kasapolan a makikoordinar dagitoy iti OSCA ken mangiparang iti valid Senior Citizen’s ID.
Kabayatanna, iti OSCA ket dackel ti akmen na iti nasao a direktiba, agsipudta isuda iti mang-monitor iti garaw ken kondisyon dagiti miyembro ken kasapolan nga adda database dagiti rumuar a nataengan tapno ammo ti lokal a gobyerno iti naan-anay nga impormasyon maipapan kadakuada.
