Nakatuding a ngumato ti service charge kadagiti eroplano.
Maibasar daitoy iti memorandum nga impaulog ti Civil Aviation Authority of the Philippines (CAAP) sakbay iti manamnama a panagngato ti travel demand gapo iti bakasyon wenno summer season.
Manipud ti napirmaan nga memorandum circular idi Abril 4, imbatad ti CAAP a ti passenger service charge (PSC) para ti international flights ket ngumato ti P900 manipud ti agdama a P550.
Para met kadagiti domestic flights, dagiti pasahero ket kasapulan nga agbayad ti P350 nu agbiahe manipud kadagiti international airports, P300 met para kadagiti principal class 1 airports, P200 para kadagiti principal class 2 airports, ken P100 para kadagiti community airports.
Iti agdama ket P200 ti passenger service charge para kadagiti domestic flights.
Nakailanad pay iti circular a siasinoman a pasahero nga agkedked wenno mapaay nga agbayad ti kasapulan a passenger service charge ket malapdanen a makasakay iti eroplano.
Amin nga pasahero ket kasapulan nga agbayad malaksid kadagiti ubbing nga agtawen ti dua, transit passengers, OFWs, ken kadagiti pasahero a saan a pinalubosan a makastrek.
Nakatuding nga agbalin nga epektibo ti memo, 15 nga aldaw kalpasan a maiwaragawag kadagiti newspapers of general circulation.
