LA UNION – Nakasaganan iti Sevilla Elementary School a pastreken dagiti teachers ken estudyante para iti face-to-face classes iti masungad nga aldaw.
Daytoy ket kalpasan nga impaayan ti Department of the Interior and Local Government (DILG) ti safety seal iti nasao a pagadalan, kaipapanan a natungpal na dagiti naiyetnag a requirements para iti maysa a pagadalan, tapno mapalubosan a makaisayangkat ti in-person classes.
Ngem sakbay a mapalubosan dagiti pagadalan iti face-to-face classes, ma-assess pay dagitoy babaen iti Dept. of Education.
Iti interview ti Bombo Radyo La Union kenni Principal Myla Manglicmot-Ducusin ti Sevilla Elementary School, naamwan a mangisayangkat ti evaluation dagiti kameng ti DEPED Division office kadagiti napili a pagadalan ditoy syudad ti San Fernando, mangrugi ita nga aldaw ti Miyerkoles, Marso 9, ket sumaruno a maisayangkat ti simulation iti face-to-face classes.
Innayon pay ni Ducusin nga ingkaso a maysa iti pagadalan da a mapalubosan iti face-to-face classes, ket impasigurado na nga agbalin a natalged dagiti estudyante a sumrek, ngem nasken nga adda pammalubos dagiti nagannak.
Inallokoyna pay dagiti parents nga ipabakuna dagiti annak da tapno adda iti naan-anay a proteksiyon dagitoy kontra iti COVID-19.
