LA UNION – Kidkiddawen ni San Fernando City, La Union Vice-mayor Alf Ortega iti Sangguniang Panlungsod a mangipasa ti resolusyon para ti nalawa nga information dissemination ken consultation kadagiti maapektaran iti panggep a panangipatungpal ti Executive Department iti Tricycle Route Plan (TRP) a maiyannurot iti DILG Memorandum Circular No. 2020-036 wenno ti “Prohibiting Tricycles, Pedicabs and Motorized Pedicabs from Operating on National Highways.”
Daytoy ket kalpasan a naammuan ti bise alkalde iti arungaing manipud kadagiti tricycle drivers and operators iti syudad ti San Fernando a maapektaran iti implementasyon ti nasao a pagannurutan.
Iti maysa a waragawag, sigun kenni Vice-mayor Ortega, nasken a maammuan pay iti agbalin a singasing dagiti maseknan sakbay a maipatungpal ti TRP.
Impanamnama ti opisyal a mataming a naimbag iti arungaing dagiti maseknan tapno makasapul iti solusyon para ti tumanor a parikot no maipatungpal ti nasao a plano.
“Ating hihilingin sa ating mga kasama sa Sangguniang Panlungsod na magpasa ng resolution para sa malawakang information dissemination at consultation upang maisali sa plano ang mga suhestiyon ng ating mga drivers at operators bago ang implementasyon nito. Atin din hihilingin na wag muna iimplementa ang nasagawang plano hanggat naisama ang mga suhestyon at hinaing ng ating mga kapatid”, imbatad ni Vice-mayor Ortega.
Naammuan a babaen iti panangipatungpal ti TRP ket maipawil kadagiti tricycles a dumalyasat iti National Highway, Manila North Road, F. Ortega Highway ken Pennsylvania Avenue iti syudad ti San Fernando.
