LA UNION – Maysa manen iti nailista a natay gaputi COVID 19 idiay Rosario, La Union.
Nakailanad iti Executive Order No. 105, Series of 2021, a naiyisyu idi kalman, Aug 17, 2021 babaen kenni Mayor Larry Flores, naipasidong iti Enhanced Community Quarantine wenno lockdown iti maysa a balay ken pasdek negosyo idiay Purok 1, Poblacion West, ti nasao nga ili.
Daytoy ket kalpasan a pimmusay iti maysa a 49-anyos a lalaki, nga akinkukua ti maysa a shop, na-diagnose iti sakit a pneumonia, natay idi Lunes ken naitabon iti isu met laeng nga aldaw idi Agosto 16, ken nakumpirma a nagpositibo iti Covid 19 base iti test result a nairuar idi kalman, Agosto 17 babaen ti La Union Medical Center (LUMC).
Dagus met a nangipeksa ti pannaki-simpatiya ni Mayor Flores iti naulila a pamilya ni RP290.
Iti agdama, addan ti 14 a bilang dagiti natay gaputi COVID 19 idiay Rosario, La Union.
Kabayatanna, idi met laeng Lunes, nangipaulog iti sabali pay nga Executive Order No. 104, Series of 2021 ni Mayor Flores, a nangipasidong iti ECQ wenno lockdown iti maysa a residential compound a buklen ti tallo a babbalay idiay Purok 7, Barangay Damortis; maysa a residential unit idiay Purok 6, Nangcamotian; ken maysa a residential unit idiay Purok 7, Carunoan West, Rosario, La Union.
Mainaig ti daytoy, naminsan manen a kiniddaw ni Mayor Flores kadagiti kailyan na nga agannad ken nairut a suruten dagiti health protocols tapno maprotektaran kontra iti makaakar ken makapatay a sakit.
