Nilamon ti dakkel nga uram iti Kut Hypermarket mall, maysa a shopping centre idiay al-Kut City, Iraq.
Manipud iti nagwaras a video iti social media, makita iti dakkel nga apoy a nagpatnag nga inuram iti makinlima a kadsaaran ti mall.
Pagdandanagan met dagiti otoridad a dumanon ti agingga 60 a tattao, karaman dagiti ubbing iti nagbalin a biktima kasta met dagiti dadduma pay a na-trap iti uneg ti pasdek.
Segun iti city health official, aganay 59 a biktima ti nalasinen ti pakabigbigan da bayat nga adda met iti maysa nga indibidwal a saan a madakamat iti pakabigbigan da gapo iti estado ti bangkay na a pirmi nga nauram.
Adu a bangkay iti narekobre kadagiti debris bayat a dagiti dadduma met ket naaramidan a makalasat babaen iti panagturong iti rooftop.
Iti agdama ket saan pay a madakamat ti rason ti uram ngem manamnama met ti pannakaiyanunsyo ti resulta ti inisyal nga imbestigasyon kadagiti sumaganad nga oras.
Kabayatanna, nangipila met ti kaso ni Wasit regional governor Mohammed Jameel Al-Mayahi kontra iti makinkukua ti mall kasaruno ti nakaam-ames a trahedya.
