LA UNION – Nakatuding inton bigat a maipasidong iti inquest proceeding idiay piskalya ti sigud a barangay kagawad a naaresto gapu iti maipagarup a panaglakona iti droga idiay Barangay Lingsat, syudad ti San Fernando, La Union idi Byernes Santo.
Nabigbig ti suspek a ni Randy Gurion, residente iti Barangay Bancagan, Naguilian, La Union ken temporaryo nga agnanaed idiay Barangay Lingsat ti nasao a syudad.
Base iti impormasyon a nakalap ti Bombo Radyo, nakumpiska manipud iti ikot ti suspek iti lima a pidaso a sachet a naglaon iti maatap a shabu, maysa a genuine P1,000 bill, 10 a pidaso iti peke a P1,000 bill a naaramat kas buy-bust money, cellphone ken weighing scale.
Aganay 10 grams iti timbang ken mapatta-patta a P68,000 ti balor ti droga a nakumpiskar manipud kenni Gurion.
Maipalagip, natiliw idi bulan ti Disyembre 2020 ti suspek iti kapada met laeng a kaso idiay ili ti Naguilian.
Ti 33-anyos a ni Gurion ket miyembro iti Saliganan Drug Group ken maibilang kas Top 6 Drug Personality iti ili a Naguilian.
Agtaltalinaed ita iti kustodiya ti San Fernando City Police Station ti suspek ken nakasaganan ti maidatag a kaso a panaglabsing Comprehensive Dangerous Drugs Act of 2002 kontra kenkuana.
