Binigbig ni Philippine Drug Enforcement Agency (PDEA) Director General Isagani Nerez a ni sigud a Bangsamoro Transition Authority (BTA) member Sultan Edrieza “Nasser” Rimbang, a maipagarop a mastermind ken kangrunaan a financier iti napaay a panangipulist ti 521 kilo a shabu nga agbalor ti ₱3.54 bilyon manipud Laos.
Segun kenni Nerez bayat iti panagdengngeg idiay Kamara, ni Rimbang ket saan laeng a basta financier ngem ketdi isuna pay ti nang-conceptualize ken nagplano ti operasyon.
Maipalagip a nakumpiskar dagiti otoridad idiay Luang Prabang International Airport idiay Laos idi Oktubre 1, 2026 ti maysa a chartered private jet a nagkarga ti 521 kilo ti shabu (a naikarga iti 21 a maleta ken naideklara a vape products) a nakatuding koma a maiturong ditoy Pilipinas.
Kabayatanna, inlawlawag pay ni Nerez nga awan ti kumpirmado nga ebidensya a ti Pilipinas iti destinasyon ti sabali pay a drug shipment a nakumpiskar idiay Thailand idi Oktubre 7.
Segun kenkuana, posible nga idiay Malaysia wenno Indonesia iti posible a ruta, ken agtultuloy pay laeng ti ar-aramiden da a pannaki-koordinar kadagiti otoridad iti nasao a pagilian.
