Sinentensyaan ti Sandiganbayan kas GUILTY ti sigud a gobernador ti probinsya ti Palawan a ni Mario Joel Reyes ken ti provincial planning and development coordinator na a ni Samuel Madamba II kadagiti 11 counts of graft gapo iti biddut a panagusar ti aganay P1.53B a gatad ti royalties manipud Malampaya gas field idi pay tawen 2009.
Manipud iti 625-a-pinanid a desisyon, sinentensyaan ti anti-graft court da Reyes ken Madamba ti innem agingga sangapulo a tawen a pannakaibalud iti tunggal kaso a graft, wenno pakaibatugan ti mapatta-patta a 66 a tawen iti pagbaludan.
Nagtaud ti kaso kalpasan a gastaren ni Reyes ti binilyon a gatad ti Malapaya Gas Field royalties kadagiti nagduduma a proyekto kas iti pasdek para kadagiti pagadalan, San Vicente Airport Development project, panangpaaramid kadagiti kalsada, solar home system, ken day care center.
Nupay nangidatag ti piyansa ni Reyes, insungbat met ti korte a napaay ti sigud a gobernador a sumango wenno mangipresentar ti ti aniaman nga ebidensya tapno lappedan ti prosekusyon.
Maibasar iti documentary evidence nga impresentar ti korte, karaman dagiti kontrata nga in-award ti nagpada a kontraktor para kadagiti konektado a proyekto ken ti report ti Commission on Audit, nagdesisyon ti Sandiganbayan nga adda iti nalawag a panaglabsing kadagiti contractual obligations.
Kinuna ti anti-graft court a napaay dagiti kontraktor nga i-update wenno isubmitir ti narebisar a listaan dagiti key personnel para kadagiti overlapping projects.
