LA UNION – Maisagsaganan ti kaso kontra ti maysa a baro kalpasan a maalaan daytoy iti shabu kabayatan ti naisayangkat a raid iti uneg ti pagnanaedanna a balay idiay Barangay Pagdalagan Norte, suidad ti San Fernando, La Union.
Nabigbig ti suspek a ni Kevin Abuan, 29, residente ti nasao a lugar.
Babaen ti search warrant nga inyatanag ti korte, sinerrek iti kameng ti San Fernando City Police Office ti nasao a balay.
Tallo a sachet a naglaon iti maatap a shabu a saan pay a naammuan ti timbang ken balorna ti nakompiskar dagiti pulis.
Kabayatanna, naglibakan met ti suspek a kukuana dagiti nasao a droga.
Ngem inaklon ni Abuan a siguden daytoy a nakabalud gapu met laeng iti kaso nga addaan ti pakainaigan iti illegal drugs ngem nakapagpiyansa daytoy iti P60,000 babaen ti tulong iti bayawna a mangmangged idiay ballasiw-taaw.
Ti immuna a kaso ti suspek ket madama pay laeng a maus-usig iti pangukuman. (Abs Flores)
