LA UNION – Pimmusayen ti maysa kadagiti beterano a komentarista ken sigud nga empleyado ti Bombo Radyo La Union a ni Abraham Ocasion a.k.a. Bombo “Abe.”
Iti interview ti Bombo Radyo iti ina-una nga anak ni Ocasion a ni Joel, kinuna na nga agarop alas 4:00 ti malem idi May 17, a natay ti ama na, iti mismo a balay da idiay Barangay Bet-ang, Balaoan, La Union.
Istorya ni Joel, immuna a nakapadas ti mild stroke iti amana ket naiturong iti ospital idi Abril 16, ngem napalubosan met laeng a makaawid kalpasan anag-normalize ti blood pressure daytoy ken naikkan laengen ti reseta ti agas na.
Ngem sipud iti dayta nga aldaw, kimmarun iti kondisyon na agingga a natay kalpasan ti makabulan a pannakaidalit.
Nagbalin a paset ti Bombo Radyo La Union ni Ocasion manipud tawen 1988 agingga a nagretiro idi 2013.
Manipud iti panagbalin na a field reporter ken nabirngasan nga “The Original Scooper” nagbalin pay a commentator, News Director, agingga a naipatugaw kas Asst. Station Manager ken naminsan metten a dimmar-ay iti TLMC idiay Manila.
Kalpasan a nagretiro iti Bombo Radyo, intuloy na iti maysa kadagiti passion na nga agserbi kas Pastor.
Nagsardeng laeng a nag-Pastor idi maiyemplementar ti Enhanced Community Quarantine (ECQ) iti intero a Luzon gapwanan ti COVID 19 pandemic, gaputa maysa ngarud isunan a senior citizen.
Inulila ni sigud a “Bombo Abe” iti asawa na a ni Nieves ken tallo nga anak na isuda Joel, Marvellous, ken Amable.
Nakatuding a maitabon iti bangkay ni Ocasion inton Miyerkoles, May 20,2020 idiay Balaoan Public Cemetery.
