Pinasingkedan ti Bureau of Immigration (BI) nga agdama nga addan iti ruar ti Pilipinas ni sigud nga House Speaker Lord Allan Velasco.
Segun iti opisyal a waragawag ti BI, awan iti agraraira nga Hold Departure Order (HDO) wenno aniaman a derogatory alert kontra kenni Velasco tapno kuma manglapped kenkuana nga agbiahe pa-ballasiw taaw.
Laksid iti pammasingked ket saanen a nangnayon pay ti detalye it iahensya gapo iti posible a malabsing a Data Privacy Act.
Kinuna ni National Bureau of Investigation (NBI) Director Melvin Matibag, nagbiahe agturong idiay Nagoya, Japan ni Velasco idi Agosto 30 ken nakatuding nga agsubli ti Setyembre 14, ngem awan met iti record ti a nagsubli isunan ditoy pagilian.
Innayon pay ni Matibag a nagturong pa-Hong Kong iti misis ni Velasco kadwa dagiti dua nga indibidwal idi Setyembre 24, ken kasta met a saan da a nagsubli iti nakatuding a panagsubli da iti petsa a Setyembre 27.
Naisangsangayan dagiti flight records da gapo iti imbutaktak ti sigud a security aide ni Velasco a ni Rodulfo Gracioso Jr. seknan iti panangipatulod ti nasurok P2B kenni Bise Presidente Sara Duterte, P1B kenni sigud a Presidente Rodrigo Duterte, ken P100M kenni Rep. Paolo Duterte babaen iti pammilin ti sigud a Speaker manipud tawen 2018.
