Na-deny ti aplikasyon para iti permanent residence sadiay Canada ti maysa a sigud nga opisyal ti Philippine National Police (PNP) gapo iti pannakairaman na ti drug war ti administrasyon ni sigud a presidente Rodrigo Roa Duterte.
Immapela ti sigud a PNP officer a ni Josue Limmong Ahuday iti nagbalin a desisyon ti Immigration Division (ID) ti Immigration and Refugee Board ti Canada a nagkedked nga awaten isuna para ti North American country gapo paylaeng iti boluntaryo a kontribusyon na iti gyera kontra ilegal a droga.
Nagserbi ni Ahuday kas opisyal ti PNP manipud Enero 2012 agingga Disyembre 2021 ken nadutokan isuna sadiay Jose Abad Santos Police Station idiay Manila ken idiay Drug Enforcement Unit ti istasyonna ken karaman daitoy iti door-to-door operations iti kapulisan kasta met iti notorious nga Oplan Tokhang.
Naglosolos iti PNP ni Ahuday idi tawen 2021 ken nagturong sadiay Canada kadwa iti asawa na ngem idi 2023 ket impakaammo ti Canadian Border Service Agency nga inadmissible isuna iti pagilian da nu pay saan metten a nadakamat a direkta daitoy a karaman iti krimen.
Indepensa ti Canadian officials a kasabwat ni Ahuday iti sistematiko ken nalawa a panagraut laban kadagiti umili a sibilyan.
Maibasar iti nagbalin a desisyon ti Immigration Division ti Canada, kinuna ti Federal court nga adda iti nainkalintegan a basaran tapno patien a karaman ni Ahuday iti Tokhang operations kas pulis iti maysa a team ti PNP drug enforcement unit ken addaan daitoy ti nauneg a pagaammo iti anti-drug campaign ken operasyon dagiti pulis para ti drug enforcement unit.
Naaramid ti pinal a desisyon idi Enero 2025, sumagmamano a bulan sakbay nga innala ti International Criminal Police Organization (Interpol) ti sigud a presidente Duterte klen naipaima iti ICC para ti kaso a crimes against humanity.
